Polisia Trânzito kontribui osan U$ 32.480 ba Kofre Estado

LIAN TIMOR (DILI) - Prezidente Repúblika, Francisco Guterres Lú Olo, hala’o enkontru semanál ho Komandante Jerál PNTL, Komisáriu Faustino da Costa ne’ebé iha enkontru ne’e akompaña husi nia Adjuntu, Komisáriu Mateus Fernandes.

Iha enkontru ne’e, Komisáriu Faustino da Costa aprezenta ba Xefe Estadu “situasaun jeral (seguransa) durante fulan-setembru nian, nomos kazus ka situasaun balu iha primeira semana, outubru nian”.

Nia hateten, “situasaun jerál teritóriu la’o di’ak” maske akontese insidente iha fatin balu hanesan iha Dili, Laclo, Manatutu, Manufahi no Laga, Baucau.

Iha setembru, tuir Komisáriu PNTL, akontese asidente hamutuk 158, maioria asidente rodoviáriu, ne’ebé halo ema na’in 10 mate no na’in 38 mak kanek todan. 

PNTL mós rejista infrasaun hamutuk 1.355 no aplika multa ba violasaun regras tranzitu iha setembru, ne’ebé hatama ba kofre estadu osan hamutuk $ 32.480.

Nune’e atu halo prevensaun ba asidente no promove konduta di’ak ne’ebé respeita regras tranzitu,

PNTL kontinua realiza pasa revista (check point), ne’ebé iha fulan-setembru PNTL realiza dala-178.

Fontes:MÍDIA PR