LIAN TIMOR (DILI) - Deputadu Bankada CNRT Jose Virgílio akuza Vise Ministro Interior António Armindo, nebeé deskonfia autoriza Kareta ida ho marka DH husi Indonezia tama Timor Leste, liu husi linha Fronteira Batugade.
Deputadu Jose Virgílio hateten, informasaun hirak neé asesu liu husi membru PNTL nebeé halaó knaár iha Fronteira Terrestre Batugade.
" simu informasaun husi membru PNTL ida mak hato’o informasaun katak, Vise-Ministru Interior Antonio Armindo autoriza kareta indonézia tama mai Timor-Leste liu husi Fronteira Terestre", hateten Deputadu iha Parlamentu Nasional Tersa-Feira (08-10-2020).
Hatan ba neé, Vise-Ministru Interior, Antonio Armindo hateten, informasaun neé laloós no nia konsidera hanesan individu nebeé tenta hafoer nia naran.
“Se deputadu ida hakarak fo sai informasaun sira hanesan neé, pelumenus halo lai investigasaun ka hare lai ba realidade nebeé mundu hotu hasoru tanba deit COVID-19", Vise Ministro Interior hatoó lia hirak neé iha PN.
" Se deputadu sira fo sai informasaun hanesan ne’e publiku hanoin katak ita maka autoriza fali kareta sira ne’e tama mai embora ita iha hela situasaun pandemia nia laran no hau konsidera ne’e hanesan individu ne’ebe tenta hafoer ita nia naran”, haktuir Vise Antonio Armindo.
Governante neé sujere, karik informasaun neé loós, nia parte koordena ona ho Komando Jeral PNTL hodi hare asuntu neé, ligadu ba membru PNTL ida nebeé maka fasilita ema tama mai teritoriu nasional, no laiha kuñesementu husi ekipa COVID-19 no ofisiais fronteira sira.
“Hau servisu profisional deit. Ema ruma hakarak vingansa politika laiha buat ida. Maibe nia odiu hau entaun ida nee bele hafanun hau haforsa hau atu bele servisu profisional diak liutan", haktuir Governante neé.
Tanba neé, António Armindo husu ba deputadu atu hatudu faktus, nuneé bele halo investigasaun.
