LIAN TIMOR (DILI) - Ikus-ikus neé, asidente sira nebeé akontese hafoin estrada públiku diresaun Munisipiu ba Kapital Dili, rejulta pasajeiru sira nebeé utiliza transporte públiku no privadu sira, sempre mate.

Situasaun ida neé, hamosu preokupasaun iha sosiedade nia leét, no mosu mos perguntas boót, tamba sá mak estrada diak, sempre mosu asidente kompara ho anterior nebeé estrada seidauk diak total alia kuak barak.

Balun kestiona, tamba kondisaun estrada diak, halo motorista sira sente seguru wainhira halaó movimentu, no halai ho velosidade makaás, no nunka mais hanoin ninia impaktu sira.

Fila-fali ba perguntas tamba-sá mak estrada diak, sempre mosu asidente ? Ita halo analiza klean ida ba kotuk, liga-ba kultura Timor nian katak, wainhira halo buat foun ruma, tenke halo tuir ka oho manu, fahi nuneé bele halaó bensaun Kultural, no bensaun Igreja katólika mos importante, maibe hirak neé hotu seidauk akontese!!!

Tuir realidade nebeé akontese ikus-ikus neé, númeru asidente sae makaás kuandu movimentu ka viajen husi Dili ba Munisipiu, no Munisipiu ba Dili.

Bain-bain katuas, lia-naín ka toko-adat sira dehan, wainhira buat foun, hanesan uma ka dalan foun, tenke halo tuir, oho animal hodi hamulak tuir, atu fo matak malirin, nuneé buat foun nebeé iha naín, nuneé ema nebeé mak utiliza, bele konhese hodi evita problema, ka labele hatauk, liu-liu asidente sira.

Ida neé mak ezemplu, maibe tuir observasaun nebeé iha, estrada sira nebeé kondisaun diak, diresaun husi munisipiu ba Kapital Dili, seidauk fo bensaun Kultural no Igreja Katólika nian. Wainhira seidauk halo tuir hanesan esplikasaun nebeé temin ona, ida neé sei fo problema boót ba Timor-oan sira nebeé utiliza Estrada neé, ho transporte hanesan motor, transporte públiku, no privadu sira.

Tamba neé, atu evita númeru asidente sira, diak liu Governu, liu-liu Ministériu Obras Públiku bolu Lia naín sira pertense husi estrada Nasional nebeé hadia ona, atu hamulak, tuir lisan no kultura nebeé iha, hodi fo bensaun nuneé estrada neé bele malirin. Tamba seidauk halo tuir, neé sei manas hela.

Neé laos ai-sasik