LIAN TIMOR (DILI) - "Fatin ida prijan neé, fatin atu halo refleksaun, fatin atu aprende, no fatin nebeé doók husi família, kolega no ema hotu-hotu, maibe hametin ita atu hakbesik áan ba Maromak".

Olavio dias Quintas, isin meta morena, hela iha Kaikoli-Dili, ho naran konhesidu OLAN. Olan mai husi Munisipiu Laútem, husi Luarai nian. Oras neé dadauk Olan harií mesak Estudio Fotográfia, no halo dokumentasaun ba aktividade ka serimónia ofisial. Ninia estudio mak ESTUDIO MUA-CHAU.

Antes harií estudio, iha terus no tarak barak nebeé liu ona, iha susar no mataweén nebeé nia ultra passa ona. Iha haksolok no kontenti nebeé nia hakat neneik.

Olan, hanesan eis prijioneiru ida. Tuir informasaun, nia hetan pena prijaun tamba komete kazu hanesan; falsifikasaun dokumentus. Durate iha prijaun, Olan iha ambisaun boót hakarak sai ema nebeé vale iha família nia matan, no sai líder ho responsabilidade ba nia família iha Lospalos-Luarai.

Olan iha inisiativa tebes, harií Estudio Mua-Chau iha tinan 2016, no hahuú neé kedan, Olan uza nia kapasidade no aprosimasaun ba komunikasaun diak, konsege komunika ho Eskola sira, hodi hasai imajen, toó halo komunikasaun diak ho Universitáriu sira iha Dili.

Imajen neé Olan mak hasai, iha Yudisium UNTL. Foto: Olan

Hafoin ida neé, Olan ninia mehi toó duni, no konsege hetan esperiensia ba profisaun nebeé nia involve, liu husi nia aktividade nebeé nia halaó. Olan tenke atende nia klientes sira, nebeé nia hasai imajen iha serimóniia ofisial, hanesan graduasaun sira. Nia mak saí naín, no nia mak sai funsionáriu rasik. Olan iha komitmentu tebes, akumula joven sira nebeé hakarak aprende buat ruma. Tamba sá mak Nia halo ida neé, tamba Olan kuaze tinan 9 ho balun, hela iha Colegio Salesianu Dom Bosco. Olan laos milagriozo, maibe nia banati Dom Bosco nia lia fuan ida prátika moris mak "Aman no Mestre ba Foin Sae sira".

Ho kondisaun moris nebeé simples, Olab ema ida ho karakter koriozu. Ninia lia-fuan bain-bain hateten "etu musan ida monu hili no han fila fali, tamba ita nia maluk balun iha fatin seluk hamlaha hela", lia fuan simples, maibe iha válor tebes. Olan hatudu ninia simplesidade nuúdar ema haraik áan, la foti áan.


Rendimentu nebeé Olan hetan, ida neé mak sustenta fali ba nia nesesidade loron-loron nian. No ida neé mos apoiu ba nesesidade família.

Eis Prijioneiru ida nebeé sente ona moris iha nakukun. Nia hateten fatin ida prijaun neé, fatin edukasaun, fatin konfesa sala, nuneé ninia tempu no minutu toó atu re-integra iha família no sosiedade, bele hatudu ho karakter diak, étika diak, liu-liu labele repete erru passadu, no sai ema espíritualidade, tamba Prijaun mos fatin atu hakbesik áan ba Maromak.

Olan sei koko nafatin atu hatudu nia esforsu liu husi servisu nebeé nia halo. Nia esforsu atu aprende nafatin buat diak nebeé bele fo benefísiu ba nia áan, família no públiku.

Tamba neé, Olan husu ba joven sira hotu atu hadoók áan husi krime, no buka nafatin atu aprende iha area saída deit, importante mak labele aprende buat nebeé desmotiva ema, no mais pior liu impede ema nia liberdade. 

Olan nia rejidensia Studio Mua-Chau iha Kaikoli, besik Edifísiu Komando Geral PNTL.

Simples ho Válor

REMATA

Hakerek husi: Amito Qonusere Araújo