“Servisu Migrasaun halo kapturasaun ne’e bazeia ba despaisu husi tribunal ne’ebe hatun ba iha Diretór Jerál Servisu Migrasaun, nune’e orienta hikas ordem mai Xefi Sektor Operasaun hodi halo kapturasaun ba sidadaun ne’e, tanba nia komete krime fraude fiskal hodi viola artigu 314 kodigu penal, tanba lakumpri obrigasaun hodi selu impostu komesa husi maiu 2017 to’o juñu 2018 ho valor montante osan $ 4.275,00 (rihun hat atus rua hitu nulu resin lima dollar amerikanu)”, dehan Komandante Sektor Operasaun Servisu Migrasaun, Inspetur Polísia Luis do Carmo Perreira, iha Vila-Verde sesta kalan ne’e.
Nia haktuir, desijaun tribunal sai ona no sidadaun ne’e loke kompania ho naran Tsawa D, Lda la koopera hodi hases an la selu impostu ba funsionariu, impostu rendimentu no impostu retensaun final no-mos uma ne’ebe nia aluga.
“Agora dadaun ita asegura hela iha sede Migrasaun hodi halo hela prosesu investigasaun no hein desizaun final husi tribunal, nia prosesu ikus konserteza sei aplika prosesu espulsaun no entrega ba embaixada haruka fila sidadaun ne'e ba nia raí," dehan Luis.
Luis informa, ninia parte daudauk halo ona planu operasaun sei halo operasaun konjunta ba kompañia sira ne’ebe fo servisu ba ema estranjeiru maibe la tuir regulamentu hodi viola vistu ne’ebe iha. No nia mos husu atu sidadaun tomak atu informa mai sede servisu migrasaun karik hetan hetan iregularidade ruma ligadu ho kazu refere inklui ema estranjeiru sira ne’ebe uza vistu turista hodi halo fali atividade profisional.
Fontes: Servisu Relasaun Públika #AX
