Hakerek Naín: Amito Qonusere Araújo

Refleksaun

LIAN TIMOR (DILI) - Tinan 29 liu ba, iha loron 12 fulan Novembru, Joven Timor-oan sira ho aten brani, hasoru meik no kroat, iha inimigu nia liman, hakilar makaás. "Mate ka Moris Ukun Rasik Áan". Joven Timor-oan sira nia aten brani, halo Mundu preokupa ho aktus kriminal nebeé Militar no Polisia Indonezia halo hasoru Timor-oan sira; oho, kastigu, no asaun oi-oin nebeé estraga ema nia vida humanu.

Tinan 29 liu, Joven Timor-oan sira nebeé halo demonstrasaun, hahuú marsa iha Igreja Motael toó Semeteriu Santa Cruz Dili, atu ba sunu lilin no kari aifunan ba Sebastião Gomes nebeé hetan oho husi Militar Indonezia.


Iha Semeteriu Santa Cruz Dili, Joven feto no mane, nunka maiss rende, hatudu sira nia espíritu Nasionalismu no Patriotismu, hodi defende Povo Maubere, ba Luta Libertasaun Nasional, nuúdar Ordem Ónradu, tuir prinsípiu Ukun Rasik Áan.

Maske iha meik no kroat nia tutun, hakilr nafatin  "Mate ka Moris Ukun Rasik Áan". Hafoin neé, Joven sira barak mate, barak mos hetan kastigu, barak mos lakon toó agora la fila, haris ho ran.


Família sira, simu konsekuenia hirak neé hotu, maibe ho laran moras, laran dodok, tamba oan sira sai husi uma, balun ba eskola, balun ba pasiar, maie rona katak, sira tenke haris ho ran, sira nia isin latan iha rai leten, halai la biban, toó agora la iha mensajen ruma.

Ohin, loron 12 fulan Novembru 2020, tinan ba dala-29, loron nebeé refletaba Joven Timor-oan sira nia kontribuisaun ba Ukun Rasik, nebeé iha válor boót tebes, iha nebeé marka istória boót, tamba loke Mundu nia matan, nia tilun, ho asaun assasinadu nebeé Militar Indonezia halo durante okupasaun Indonezia.


Hakruk no fo Onra klean ba Juventude Loriku Aswaín nebeé mate ona tamba Luta ba Ukun Rasik Áan.

Respeitu mos ba mate restu sira nebeé hetan terus, mataweén altura nebaá.

Parabéns ba Juventude Loriku Aswain tomak husi Rai Ulun toó Rai Ikun, tasi feto toó tasi mane.

Parabéns ba Loron Nasional Juventude.

Viva RDTL

Viva Povo Maubere