Tuk, tak, tuk, tak, tuk, tak,…. rona lian husi ema ida be hakat hakbesik mai, hodi bisu-bisu buat kmo’ok ba tilun laran. Nia lori hau to’o iha jardim ida ne’ebé nia aroma la hanesan sá mak sente bai-bain. Nunka ba japaun maibé aroma husi sakura ne’e halo hau neon mout no hakarak hela metin iha ne’ebá.
Lalatak husi sakura ne’e halo jardim tomak sai furak no funan bé kor-de-rosa, parese nakfilak tiha ba unuk hodi hafalun hau, iha anin ho aroma sabo’or nia le’et no hakarak atu neon ida ne’e mout liu tan, atu naha todan bé tula ba neon ne’e, bele nakraik tiha ba.
Lian at husi lidun ba lidun ne’ebé mak sente lor-loron, naresin tiha tilun, rai hut bé kalan eh loron nafalun, karik la’o iha luron, sai tiha oin seluk, anin malirin halai husi hau nia horon, borus to’o aten book, tais lalais venenu a’at sira iha aten book laran, lalatak husi sakura ne’e bisu-bisu mak hau atu hela metin iha kintal ne’e.
Derrepende.. sente bá, bé jelo turuk ida monu iha inus tutun, borus tama to’o kakutak laran hodi hakfodak husi mehi naruk no furak, ba rai ne’ebé ninia aroma no ar, nunka sente iha moris tomak.
Hader husi kama, tula liman iha ain tu’ur leten no tane hau hasan..., ren to’os urat sai de’it iha dader bé loron matan seidauk leno rai no hamaran maho wen sira bé turuk iha ai-tahan leten no manu sira seidauk semo, basá loron nia mana’as seidauk hanas nia liras atu bele loke-an hodi semo hadulas no buka buat funan ruma hodi hakesi estomogu.
La’os hanesan ai-knonoik ida, basá aroma ne’ebé hau dekór hela iha ulun no husi mehi ne’e, lori hau nia neon atu hamout hikas iha tinan ne’ebé liu bá ne’e, maibé la furak atu sukit sai fali, buat naklekar sira ne’ebé mak hafalun ona tinan naruk ida.
Husi mehi bé liu ba ne’e, husi hau nia neon, nia morin sente bá la’os buat foun, hanoin hau nia murak be’e bé uluk hau fó fiar, ho neon ho laran tomak, maibé nia helik an, husi ahi oan ne’ebé hau lori hodi leno dalan oan ne’ebé ami liu ba ne’e. nia helik an, tan deit dalan ne’ebé mak liu nakonu ho tarak no meik no baihira sona borus ain, sei sente to’o fu’uk lahan hotu no ran iha isin lolon tomak sei sai fatuk.
La’os sakura lolos husi mak haktuir husi mehi ida ne’e, husi mundu real ne’e, maibe aroma ne’e halo hau, atu hau nia neon ida ne’e, atu mout tan deit ona, la hatene hau nia murak uluk ne’e, iha momentu ida nia tu’ur ho xá kopu ida, nia neon mout hanesan hau no hakarak, loke no kaer hikas surat tahan mutin ida, hodi hafoer nia ho tinta lapijeira kona bá dalan naruk, bé sikun no dalas bé liu ba ne’e no hafutar ho kosar, mata wen kontente no triste nian?....
“lae! fatuk ne’ebé hada ona ne’e husik ba nia tahan, uluk naksobu tamba i’is foun no latahan iha meik no tarak nia let”, hanoin iha hau laran, waihira tun husi kama hodi halo daduk kafé iha xikra no hatu’ur iha miziña leten no loke mos livru romanse ida hodi hariku hau nia neon.
Iha momentu ida, waihira balun loke fuan no hakarak hakuir ba malu saida mak sai sasidik, iha kada minute ida hakat ba ne’e, lia rihun ba rihun mak taes husi tilun no monu laran no hatutan mos lia murak balun, atu bele kore netik buat todan ne’ebé tula hela iha neon no dala ruma, matan ben sai mos, todan ne’e la kohi katik sai tuir.
loron ida antes, sai husi fatin ne’ebé hakna’ar an ba, la’o ba uma mahon bé hau kasu todan bá loron tomak, sente ba hanesan hulan naha karon sanulu “susar atu haktuir iha minute ida nia laran”, la’o ba no la’o, hakbi’it an nafatin hodi to’o mahon ne’ebé hau bele kasu todan tomak.
“Na’in, mundu ne’e a’at teb-tebes, la iha ida mak laran kmanek bé hakma’an buat hotu ne’ebé hau hulan ne’e, hau haka’as hau nia ruin knosen ne’e, maibé la iha funan ida mak hau ku’u liu husi kosar bé hau liki nodi monu hamokon rai ne’ebé hau la iha kbi’it atu muda ninia lalaok”. bisu bisu ba hau nia an, waihira hamoris ahi oan lilin iha kuartu ki’ik laran hodi hamulak ba na’in ne’ebé sai mahein ba hau.
basá hau fiar, hau nia anju mak ema ne’ebé la iha lalatak ne’e no hau kasu lia ba nia no nia tulun hau atu tatoli ba hau Na’in ne’ebé hahu hahi, liu husi fatin oan ne’e, kuartu oan nakukun ne’ebé hau loke ahi oan, baihira atu ba kasu kolen ba loron naruk ida.
husi fatin ne’ebé mak hau kasu kolen ne’e, hau hein buat kmo’ok ida bé hakaman naha sira ne’e, basá hatene katak, buat ida la muda, iha minute ida eh oras ida. haka’as nafatin ruin knosen ne’e, husi loron ba loron mak sei fó biban atu tenta fixa no taka buat tohik sira ne’ebé sukit sai ona.
se mehi ba jardim ne’ebé nakonu ho aifuan sakura ne’e karik, hau hakarak hasai kilo ba kilo no karon ba karon bé hau hulan ba ne’e, hau hakarak neon ida ne’e, neon ne’ebé hulan buat rihun rahun ne’e, hakmaan, waihira sente aroma husi ai funan sakura no anin fresku husi horon sona borus to’o aten book, hodi taes venenu sira ne’ebé rai kleur iha aten book laran.
hada dadauk fatuk ida hodi hari’i uma hun ida bé bele dura ba tinan naruk, maibé dala ruma nakdoko nafatin, tamba la sente moruk no midar antes, mak dala ruma moruk bé sente liu fali aidila tahan, nune’e tenta no tenta nafatin atu habelun ida bé hakarak fahe hanoin, maibé la fahe tutan no karik rona no hanoin katak fó buat diak bele fó ba malu no ladiak nia husik monu ba rai de’it.
hakur ona dalan husi loro sa’e to’o loron monu, lalatak husi karon bé hulan sempre mai hafalun hau, maibé t hatene katak, lia ruma ne’ebé mak ita foti iha tempu uluk ninia funan mak agora. Na’i Maromak rasik mos haktuir ona iha nia lia lulik sira katak, saida mak o kuda mak o sei ku’u nia fuan.
