Tinan lima liu tiha, dalan ne’ebé uluk sai sasin monok, ohin haré hikas hau nia lalatak no sira tenta atu hasé, maibé la iha ibun atu ko’alia.

Waihira liu dalan ne ‘e, iha sentimentu no hanoin rihun ba rihun ne’ebé hafalun hau nia hakat sira.



Sente sala? Lae! Los? Lae! Ritmu husi viajem ne’ebé mak akumuladu iha soneta ida no wahira le’e fali sente ba, lian rihun ba rihun ne ‘ebé mak mosu iha lidun ba lidun nakfilak sai nonok no hau mos konfuzu, tamba saida mak sai nune’e.

“dala ruma sira triste, tamba sira mak sai sasin ba promesa sira?, sasin monok sira keta hirus hau, basá buat hotu tempu mak regula” hanoin iha hau nia laran no tenta husu deskulpa ba sasin monok sira.



Sé uluk hau liu fatin ne’e, iha ema balun mak kaer balun mak kaer hau nia liman no bisu-bisu mai hau saida mak nia hakarak ba tinan lima mai, maibé tinan lima liu tia,  saida mak nia hakarak no hau apoia la sai realidade.

“hau hakarak atu tempu ne’e hakiduk fali ba kotuk, para hau bele luta ba promessa sira hodi atu sai  realidade” hanoin iha hau nia laran, waihira liu fatin ne’e no derrepente udan tau maka’as no para netik hau nia motór hodi sadere netik ba parede uma nia atu labele bokon.

Hau liu dalan ne’e, maibé hau la mesak, iha balun mak hamaluk hela, hodi  haktuir mai hau saida mak nia hakarak ba tinan lima mai no dala ida ne’e sai konfuzaun liu tan, basá tinan lima liu ba komprimissu iha fatin ne ‘e falla no agora promessa foun tan, saida mak atu akontese? Nai Maromak.. sá los mak ne’e?



Dala ruma sasin monok sira, antes rona promessa ne’e sira dala ruma hanoin nune’e: “tinan lima liu ba nia ko’alia buat barak, maibé buat hotu la iha folin, agora nia ko’alia rihun ba rihun, nia atu kumpre ida ne’ebé los?”. Los duni, iha tusan ida ba sira, basá sira lia rihun  bé saran iha tinan lima liu ba la ida ida mak kumpre no ida bé ko’alia mai hau ne’e iha ona ema seluk nia hako’ak no sasin monok sira la kohi atu repete fali.

Sá los mak atu halo ba promessa foun ba ida be hamaluk hau iha fatin  ne’ebé hau sadere ba iha tempu udan ne’e? Sé sasin monok sira mak ko’alia karik sira atu dehan sa los ba ibun bein a’at ne’e, sira baruk ona ho promessa foun bé hau tada ne’e.

Maibé tenke kompriende katak, buat ne’ebé la’o dadaun ne’e hanesan parte ida husi istória moris, biar sasin monok sira hirus no la hasé oin ba hau, maibé ne’e realidade ida bé tenke hasoru.

Maibé, minutu naruk bé hahu hamrik hakarak tebes atu dada hikas tempu liu ona ne’e mai kotuk, basá iha minutu balun nia laran hanoin hikas morin ne ‘ebé horon iha tinan hirak liu ba, sente midar  ne’ebé mak tempu liu ba aproveita, maib’e derrepente hakfodak no konsiente katak imajinasaun no memória deit ona.

La iha ona kbi’it atu hahu fali história uluk ho postura agora, no 



momentu ne'e halo  hau hanoin fali matéria trava lingua iha eskola “O tempo perguntou ao tempo quanto tempo o tempo tem, o tempo respondeu ao tempo que o tempo tem o tempo que o tempo tem”,.. hafoin ne’e haré trailer husi filme intitulado Quanto tempo que tempo tem no kaer toman lia fuan ida “tempu sempe liu ho linear ho baze Kronolojia husi tempu no tuir titi taka relojiu” no ikus mai rende ba buat ne’ebé mak liu ona.

Pájina foun bé loke ne’e, komesa hafutar ona ho lia fuan sira no kronolojia atu bele hanoin saida mak atu akontese ba loron aban no derrepente video ida ne’ebe partilla husi kolega ida hateten, la iha vale ona atu rekurpera ona ida ne’ebé mak lakon no difísil atu atu muda tempu uluk.

Merry riana tenik “Tenke brani husik tempu passadu, tamba moris ne’e importante no Furak liu hein hela ita”