Dili, 29 Setembru 2022: Prezidente Repúblika, José Ramos-Horta deklara, sei la simu subsídiu ho karákter universál dólar amerikanu atus rua ne’ebé governu sei atribui ba sidadaun, inklui ba membru órgaun soberania sira iha fulan-Dezembru, bazeia ba Dekretu Lei, Númeru 27/2022.

“Buat rua, se bele karik governu fó de’it ba komunidade ne’ebé empregu laiha ou vensimentu ki’ik, solusaun seluk mak ita idak-idak ho ita-nia konxiénsia fó osan ne’e tun ba sira ne’ebé osan laiha,” Prezidente Repúblika deklara buat ne’e hafoin to’o iha Timor-Leste ho aviaun ne’ebé oferese husi Governadór NTT.

José Ramos-Horta
Xefe Estadu husu ba governu atu halo desijaun polítika hodi atribui de’it subsídiu dólar atus rua ba sidadaun ne’ebé ho rendimentu mensál menus hosi dólar amerikanu atus lima.
Kada fulan Prezidente Repúblika oferese porsentu lima nulu, husi nia saláriu mensál ba organizasaun ne’ebé serbisu ba asuntu sosiál hodi tau matan ba ema ki’ak sira.
“Ha’u hateten ona, porsentu 50 ha’u nia vensimentu, fahe ba organizasaun balun ne’ebé tau matan ba ema ki’ak, hahú kedas iha Juñu, maibé seidauk fó, sei akumula hela to’o Dezembru mak entrega, ne’e la’ós primeira véz, dezde iha Primeira Prezidénsia (2007-2012) kedas, inklui mós per diem ne’ebé balun ha’u la gasta, entrega bá fundu espesiál ida iha Prezidénsia atu fahe ba indivídu ka organizasaun ruma ne’ebé serbisu di’ák ba ema vulnerável,“ haktuir Xefe Estadu.


Xefe Estadu mós husu ba sidadaun sira ne’ebé kada fulan manan saláriu liu dólar amerikanu rihun sanulu atu oferese ba ema ki’ak sira nu’udar prezente Natál ba sira.
Relasiona ho partisipasaun iha Asembleia Jerál ONU, sesaun espesiál husi Komisaun Konstrusaun bá Pás no enkontru ho líder mundiál oin-oin iha Nova Iorke, Prezidente Repúblika deklara katak, Timor-Leste sai ezemplu ba rezolusaun konflitu.
“Misaun ofisiál bá ONU, enkontru ho Sekretáriu Jerál ONU, António Guterres, Primeiru Ministru Portugál no Kambódia, Sekretáriu Estadu Negósiu Estranjéiru Finlándia, intervensaun iha Asembleia Jerál ONU, intervensaun mós iha Peace Building Commission, Forum G7+ ho Maun Bo’ot Xanana, Sekretáriu Jerál ONU felisita tebes ita (Timor-Leste), iha konflitu bo’ot iha mundu, inklui ita nia rejiaun, Timor-Leste sai ezemplu ida kona-ba pás no governasaun polítika di’ák, laiha konflitu oin-oin, sira mós kontente kona-ba jestaun Covid-19,” relata Xefe Estadu.