Foin lalais neé, Xefe Estado Maijor General Forsas Armadas (CEMGFA) Maijor General Lere Anan Timur deklara, la aseita atu Instituisaun Polisia Sientífika Investigasaun Kriminal Polisia (PSIK) Uza armas hodi halaó servisu, tamba Konstituisaun RDTL admite F-FDTL no PNTL mak uza armas, hodi kontrola seguransa Interna no Externa.
Maske lamentasaun neé hatoó ona, maibe Armas nebeé PSIK sei utiliza oras neé iha ona Timor Leste nebeé sosa husi Nasaun Israel.
Iha parte seluk, Organizasaun Fundasaun Mahein mos la aseita atu PSIK uza Kilat, tamba kestaun hirak neé hareé ba kazu no situasaun nebeé akontese iha Kapital Dili, hanesan Kazu Kuluhun, iha nebeé membru PNTL tiru mate joven naín 3, kazu Ainaro nebeé membru tiru kanek membru Forsas Armadas ida, no kazu tiru husi membru PNTL.
Tuir João Almeida, aumenta kilat hanesan aumenta problema wainhira la kontrola diak kona-ba tempu utilizasaun no ninia sirkunstansia.
Tamba neé, Fundasaun Mahein husu Komisaun B Parlamentar atu investiga polemíka públiku kona-ba utilizasaun armas husi PSIK, nuneé bele halo klarifikasaun.
Relatóriu nebeé Fundasaun Mahein públika kona-ba modelu kilat nebeé aprova ba PSIK mak Glok-19 tuir Diploma Ministérial numeru 33/2017.
Foin lalais neé, Primeiro Ministro Taur Matan Ruak hateten ona katak, admite atu uza armas maibe tenke iha formasaun, nuneé bele hetan sertifikasaun hafoin bele lori kilat.
Toó oras neé, públiku seidauk hatene total kilat nebeé sosa ba PSIK.
Entertantu Polisia Sientífika Investigasaun Kriminal Polisia (PSIK) harií tuir Dekretu-Lei númeru 21/2014 loron 6 fulan Agustu 1.º alterasaun Dekretu Lei númeru 15/2014 loron 14 fulan Maio.
Iha artigu 2 PSIK hateten, PSIK hanesan korpu Superior Polisia Kriminal nebeé organiza tuir Irarkia Ministériu Justisa nia mahon ho autónomia administrativa, finanseira no patrimónial.
