 |
| Komunidade tula tekniku EDTL ida ho motor ba Óspital Postu Baguia nebeé ahi eletrika soke, tamba komunidade kontaktu ho Ekipa Ambulansia, maibe la iha respostas. Foto: Facebook |
EDITÓRIAL (LIAN TIMOR) - Durante periodu Ukun rasik áan, sidadaun hotu-hotu preokupa ho Dezenvolvimentu Nasional, hanesan problema beé moós, estrada, eletrisidade, no kondisaun iha seitor sosial hanesan Edukasaun, Saúde no seluk taán.
Koalia kona-ba Seitor Saúde, neé problema boót nebeé toó oras Governu nunka mais atu rejolve.
Rajaun fundamentu ida mak Ambulansia nebeé atu tula pasiente sira.
Kada Tinan 5, Parlamentu Nasional Timor nian, iha kada lejislatura, Deputadu sira hetan regalias oi-oin husi Estado tamba aprova Lei ba áan rasik, duke kria kondisaun diak ba nia sidadaun sira. No kada lejislatura, Deputadu sira aprova osan hodi sosa Kareta, maibe la iha polítíka diak atu aprova osan hodi sosa Ambulansia hodi tula sidadaun sira nebeé presija ambulansia.
Sidadaun barak mate tamba la iha ambulansia, wainhira nesesita atu ba Óspital. Inan isin rua moos tenke mate, tamba la iha ambulansia atu tula ba sentru saúde sira, obrigado tenke partus iha nia rejidensia.
Moras balun tenke hulan, balun tenke tula ho gerobak, balun tenke uja motor, enkuantu pasiente nia kondisaun moras grave tebes.
Maibe reprejentante Povo iha Umu Fukun Parlamentar diuk no delek ba problema sira neé, no importante mak deputadu/a sira tenke hetan kondisaun diak.
Deputadu/a sira iha Parlamentu Nasional tenke loke matan, loke neon, no tun ba baze liu-liu area remotes hodi observa kondisaun nebeé Povo infrenta, laos koalia povo nia moris tamba asesu informasaun iha mídia sosial husi fontes anonimu.
